الناقة اللي ركبوها الرجاجيل
في وسط حوض الشاص وما قيدوها
قامت تذيع الصوت وتشكي من الويل
يوم انهم عن احوارها ابعدوها
خوفوا من الله يالرجال المشاكيل
وعلى ولدها عجلوا ورجعوها
خالد بن ناصر المخيمر
واعز حالي عنك يالقعود
بكرة يصير البيع بالكيلو
وراسك معلق بين حبل وعود
واللي قطع راسك يقل شيلو
بعشرين يالله ما نبي من زود
ومن يشتري منا بنمشيلو
نايف عطالله الجعيد - شقصان
راعي القعود ارجوك انا بفرق السوم
وازيد في سعر الجمل كاش وارضيك
من شان حق الضيف ورجال قروم
ونعزم عليه اهل الخزامى وندعيك
والجار له حق على الجار ملزوم
قدم له المعروف لو كان ياذيك
سعود بن سعد الحافي - الرياض
ياراعي الموتر على الهون
افطن ترفق على الركاب
ترى خويك ثقيل وزون
وياما مضى له مع الاعراب
يشيل الهودج مع المزيون
واليوم قللوا له الاصحاب
راضي علي المطرفي - الخرج
يااهل المبادي والقلوب الرحيمة
ويش رايكم باللي تشوفون بالعين
اللي يجسدها غارساً نصف سيمه
وشلون يالأخوان هالقلب ما يلين
ونبينا وصى برفق البهيمة
لجيت تذبحها تخفي السكاكين
عبيد فنيس الوهبي - النعيرية
انا بوسط الحوض والقلب مشغول
في حالة يرثى لها وارحموني
اصيح ثم اصيح والفكر مذهول
ابي ربوعي ليتكم تتركوني
المقصبة مالي بها ليت بحلول
وجدي على المرباع لو توصلوني
محمد بن عبدالعزيز الخنيفر
ياونتٍ ونها المفرود
في حوض رايح للديرة
ايامه اقفت ما من فود
يوم الجزازير بتديره
عقب النصي يم النفود
يطلب من الله الخيرة
عبدالكريم ابراهيم الخزيم
سبحان رب خلق الابل وصخرها
حلال للآدمي ماكل ومركوبي
الابل عطايا الولي ماحد بناكرها
تصبر على حمولها وتصبر على الشوبي
ياكم شجاع غدت به مع جرايرها
يوم المغازي بها كاسب ومكسوبي
البشري مناحي الهبداني - الرياض
راعي البكرة تصيد للزباين
حطها في دربهم حتى يجونك
يشتروها خص لاجا فالمزاين
يجيك مليونً وفوقه يطلبونك
بكرتن عفرا وفيها الزين باين
لا اقبلت تطبق على لحيك اسنونك
غنام مسعود القريني
عقب التمشي بالفجوج الوسيعة
اليوم حان الوقت يجزرك جزار
اليا عصاك الوقت لازم تطيعه
ومن خلقت الدنيا ترا الوقت دوار
عيد فهد الجمعان - الاسياح
ياهل العقول النيرة والسليمة
ياللي نظر تو صوره بالخزامى
ياكيف يعقل يعقلون البهيمة
بسيمن مصدي من بواقي الركاما
عقاله يا أخوان حبل بقيمة
خمس ريالات وما علينا ملاما
نبيل فايز العبدالقادر - الرياض
الجمعة اللي وافقت يوم عشرين
بالصوت والصورة وكامل عددها
شفت العراوي مار مدري على وين
محمل الوضحى وتارك ولدها
وهي تصيح وتلتفت له بعينين
الدمع غطاها وغرق جسدها
عطاالله ابراهيم الزيني
يامحرج السوق حرج لي على الحاشي
عجل علينا تراني ناوي الطرقة
حرج وعجل تراني ياولد ماشي
حرج واذا جاك صامل بع وهت حقه
راسي ترى اليوم يابن الناس منداشي
واخاف ضغطي يزيد شوي ويطقه
سلطان بن حمد الحبابي
الحاشي اللي رابطينه على الجمس
في نظرته ياناس عرف النهاية
يشوف ناساً واقفة تفرك الخمس
كل يقول اليوم هذا غدايه
ملهي علي الفريدي
ولاوالله لاشالوا الحق فالصندوق
عسى الله يغل البيعة يعود لاماته
يبعط ويرغي ما معه بخدة بالسوق
ولا قدمه الا الموت واخذان بيزاته
وقف يومه الماعود ما يمنه مفهوق
وقد هو على الموتر بربطه وداياته
مبارك محمد الضعاوين
